Euskarazko institutuaren aldeko mozioa onetsi zuten Atarrabiako Udalean UPN, Atarrabia/NaBai eta ANVren botoekin. PSN eta IUko zinegotziak aldiz, abstenitu egin ziren (PSNk ez zuen bozkatu).

D ereduan izan den matrikulazio kopuruaren handitzea dela-eta sortutako «egoera kezkagarriari» aurre egiteko eskualdeko euskarazko institutuaren aldeko mozioa onartu zuten. Ahal bada, Atarrabian kokatzea nahi lukete. Gauzak horrela, gai hau «lehentasunezkoa eta urgentziazkoa» izango da Atarrabiako Udalarentzako. Gainera, arazoak eragiten dien beste udal eta apymekin «komisio mistoa» sortzea bultzatuko da, Nafarroako Gobernuak hornidura hori sustatu dezan.

Komisio hori arduratuko da zentroaren kokapena aukeratzeaz, «existitzen diren alternatibak» kontuan izanda. Aldi berean, Atarrabiako Udala herrian kokatzearen aukera aztertuko du, «biztanle eta ikasle kopuru gehien duen herria» baita. Horrela jasotzen da NaBai eta ANVk aurkeztutako mozioan.

David Bizkaik (ANV) adierazi zuenez, udalerriak elkartuta, Nafarroako Gobernuko Hezkuntza Departamentura bideratzeko proposamen bateratua egitea da helburua, eta aldi berean, urte honetako foru aurrekontuek gai honetarako partida jasotzea lortzea.

Jose Luis Urizek (PSN) azaldu zuen bere taldeak ez duela Udalean «dagoeneko bozkatuta» dagoen gai batean, «ez dugu udalbatzar bakoitzera eramango». Urizek bigarren hezkuntzako institutu bat defendatu zuen Atarrabiarako, baina hizkuntza eredu «guztientzako», ez bakarrik D eredua, «denek baitituzte eskubide berdinak». Bestalde, Urizen hitzetan, Udal Planaren barruan lantzen ari diren debatearekin erlazionatuta dago gaia eta Dominikoetako hornidura orubean hezkuntzako azpiegitura horietarako erabili beharko litzateke. Charo Fraguas (IU) bere taldea hezkuntza zentro berria sortzearekin ados dagoela azaldu zuen, baina, PSNrekin bat egiten duela esan zuen hizkuntza ereduari dagokionez; kokapenari dagokionez, Dominikoen orubea erabiltzearen aldekoa da.