Burlatako Askatasuna institutua kurtso hasiera zail batekin topatu da aurtengoan, kontratazio arazoak eta eritasun-bajak direla eta, irakaslegoko 7 lanpostu oraindik libre baititu, hau da, plantila osoaren %12a. Zazpi klase horiek eman gabe gelditu dira, eta, atzerapen horren aurrean, Fermín Gorraizek, Askatasunako zuzendariak, azalpenak eskatu dizkio Hezkuntza departamentuari galdera zuzen baten bidez: Nolatan eskatu behar diegu geure gazteei errespontsable izatea, Administraziotik ez denean jarrera hau nabarmentzen?

Kurtsoaren lehenengo bi asteak igarota, Askatasuna institutuan gaztelaniako irakasle postu bat (bertako irakasleak amatasun-baja hartu du), Batxilergoko bigarren kurtsoko ingelerako postu bat (ikasleek klase honetako sei sesio galdu dituzte dagoeneko) eta ingelera-frantses orduekin daukan beste postu bat bete gabe dago. Guzti horri, 15 eguneko bi lizentzia eskaera gehitu behar zaizkio, ordezkapenik bidali ez zaizkienak. Gainera, euskara eta historiako postuak ere betetzear daude.